Ds Danie Steyn

Die Outoriteit van die Bybel

Jes 8:20 – “Terug na die wet en die getuienis van die Here! Wie nie volgens hierdie woord praat nie, is sonder toekoms!”

Jes 9:1 – “Die volk wat in duisternis wandel, het 'n groot lig gesien; die wat woon in die land van die doodskaduwee, oor hulle het 'n lig geskyn.”

Is dit moontlik om te leef en te sterf op hierdie aarde sonder die outoriteit van die Bybel? Ja, miljoene hoor, maar gaan verlore in ongeloof. U ongeloof doen niks aan die outoriteit van die Bybel nie, maar dit maak ú kwesbaar.

In Jeremia lees ons hoedat God se Woord soos vuur gemaak is en die ongelowiges soos droë hout, sodat die vuur die hout kon verteer. En dit is die plig wat God aan elke prediker van die Evangelie gee. Iets wat swaar op my hart lê is dat diegene wat nie in God se Woord glo nie, in die ewigheid daarvoor sal moet betaal. Maar ons lees in Jeremia 6:14 van predikers wat vrede en veiligheid preek, terwyl daar geen vrede is nie. Hulle genees die verbreking van die volk van God deur net van vrede te preek, alhoewel daar geen vrede is nie. Hulle pleister met los kalk.

Maar ons moet uitroep soos Jer 22:29 - O Land, land, land, hoor die Woord van die Here!

God se Woord is geïnspireer deur die Heilige Gees. Ons lees in 2 Pet 1:21 hoedat die heiliges van God deur die Heilige Gees gedrywe was om te spreek soos hulle gespreek het. Paulus sê ook in 2 Tim 3:16 dat die hele Skrif deur God geïnspireer is.

Nou, wat staan ons te doen volgens die Woord van God?

Ek wil kortliks twee voorbeelde gebruik.

1) Eerstens weet ons dat die besnydenis nie meer vir ons bedoel is nie. Rom 2:29 sê dat die ware Jode nou diegene is wat van hart besny is, nie volgens die letter nie. En in Gal 5:2 maak Paulus dit duidelik dat Christus van geen waarde meer is as ons ons volgens die letter laat besny nie.

2) Tweedens is daar nie meer aardse priesters nie. In Hebreërs lees ons hoedat die Hoë Priester, Jesus, Homself een maal geoffer het as 'n Offer vir almal.

Maar ons het 'n baie groot probleem - mense nie wil aanvaar dat hierdie Woord die gesag van God dra nie.

Ek praat in een konferensie met die kerkraadslede oor die `Vuur uit die hemel’ wat ons benodig. Een ouderling staan toe op en sê: “Ag kan ons nie maar aangaan soos ons altyd aangegaan het nie.”

En dit is die probleem waarmee ons vandag te make het.

F Stauss het in 1837 gesê: “Gebruik die Bybel, maar neem net die bonatuurlike uit die Bybel uit “. Maar dan sal die Bybel net soos enige ander boek wees - sekulêr, en donkiekos - nikswerd.

Die probleem was reeds daar in Jesus se tyd, met die Saduseërs en die Fariseërs. Hulle wou nie die geskrewe Woord van God of dié Woord van God - Jesus - aanvaar nie.

Die intellektueles van vandag soek na die waarheid in die lig van vandag se wysheid en lig.

Laat ek dit soos volg illustreer: Daar was eenmaal 'n toneel met 'n Duitse harlekyn. Die hele verhoog was donker, net 'n lamppaal het lig in een hoek gooi. ‘n Man het naarstiglik na iets in die lig van die lamppaal gesoek. 'n Polisieman sien hom toe en vra waarna hy soek. Hy sê toe dat hy na sy sleutels soek. Hulle albei soek toe saam. Na 'n tyd vra die polisieman hom: “Is jy seker jy het hulle hier verloor?” . “Nee, antwoord die man, daar in die donker, maar dis te donker daar, so ek soek maar in die lig”.

Net so is dit met die ongelowige teoloë, filosowe en wetenskaplikes. Hulle soek na die waarheid in die bestaande lig van hierdie wêreld. Hulle weet egter nie wat dit beteken om weergebore te wees uit die duisternis tot die lig nie. Ek was self een aand 50jaar gelede uit die duisternis geruk tot die wonderbare lig van Christus. My hele lewe is omgekeer en tot vandag toe kan ek nie stilbly nie.

Ons lees in Mt 13:24-30 van valse Christusse wat onkruid saai waar die goeie saad gesaai is. Ons vind dit in ons kerktydskrifte en koerante. Filosowe en teoloë wat ongelowig is en verwarring saai. En die kerk ly daaronder.

Voltaire het in sy tyd gesê dat daar binne 25 jaar geen Christendom of Bybel meer sou wees nie. Hy het gesterwe, en 40 jaar later is sy eie huis gebruik vir die druk van Bybels en Christelike literatuur. So sien ons die krag van God aan die werk en kan ons volle versekering in die outoriteit van God se Woord hê.

Maar dan kom ons nog by die ergste. Die satan werk deur verleiers wat nie net die outoriteit uit die Bybel haal nie, maar Christus self ook. Hulle maak Hom tot net nog 'n profeet. Dan is Hy nie meer die Here van die here en God nie.

Wat is die gevolg van al hierdie verwarring en ongeloof in ons tyd? Homoseksualisme word goedgepraat in die kerk. Predikante is bereid om hulle selfs te trou in die kerk. In stede dat hulle hulle afskuwelike sonde sien en bely volgens 1 Joh. 1, word dit afgemaak as 'n swakheid - 'n geboortegebrek. Maar ons moet die sonde haat en ons hand uitsteek na hulle om hulle van hulle sonde te red tot Christus.

Paulus sê dat die wat nie na God wil luister nie, deur God oorgegee word aan hulle sonde. Hulle kan dan net doen wat hulle wil, maar die gevolge van hulle sonde sal hulle dra. Ons lees daarvan in Gen. 19 - hoedat God hulle oorgegee het aan hulle losbandigheid en hulle toe met vuur en swael vernietig het.

En watter oplossing gee hulle dan aan diegene wat nie met hulle sonde wil breek nie?

1) Kondome

2) Goedkoop pille en medisyne in stede van God se Woord.

En baie predikante is te bang om God se Woord in waarheid te verkondig en die tug toe te pas soos dit in God se Woord voorgeskrewe is.

Ons lees hoedat Petrus verklaar dat daar net één Naam is waardeur ons gered kan word - Jesus. En Paulus in 1 Tim 2:5 – “Daar is net één middelaar tussen God en die mense - Jesus Christus”.

Paulus sê dat enige ander evangelie vervloek is.

Kom ons kyk hoe dit gaan wanneer daar geen wet is nie. Ons lees in 2 Kon. 21 - 23 van die goddelose koning Manassa wat self sy seun aan afgode geoffer het. Die boek van die wet het in die tempel verlore geraak! Maar toe die goeie koning Josia begin regeer het, is die boek van die wet weer in die tempel gevind. En ons sien die heerlike verandering wat dit te weë gebring het.

Indien die Bybel nie soos dinamiet in ons lewens ontplof nie, is dit nie die Woord van God in ons lewe nie.

Die Bybel moet deel van ons lewe wees – dan kan ons ook al die voorregte daarvan geniet.

Last edited on: Tuesday April 03, 2007 E-mail us at: mail@ksb.org.za Return to KSB Home page